是打交?? 還是跳舞??

踏入2011年, 先同各位講聲新年快樂, 身體健康!!

在今天, Daphne已經有85日啦, 約2個月3星期, 大個了很多, 體重有6公斤, 而身高有59.5厘米啦!! 

在Daphne還是個半月時, 佢已開始手舞足蹈, 開始常常Mehmet逗她玩, 佢好似咩都明白和同我地一齊玩, 我覺得而家BB已經唔同以前年代嘅BB, 好似咩野都識咁!! 例如, 好細個便懂得睇電視, 玩電腦, 聽音樂, 有板有眼, 有次見到佢同Mehmet玩得好開心, 好似兩父女喺度打Boxing, 我即時拍低同大家分享吓:

 
係唔係好搞笑呀!! 最攪笑係Daphne睥住Mehmet, 好似一定要打低Mehmet咁!!

有D朋友話佢地兩個似跳舞多過似打交喎!! 

香港人與土耳其人的分別與共通 -- 禮讓篇

首先祝大家聖誕快樂, 身體健康!!

今日去完個朋友到開PARTY, 回家途中, 本來係好開心, 點知比D野攪到自己好唔開心....有感而發, 一定要舒發下我的憤怒....

去了土耳其兩年了, 我看到D土耳其文化及生活, 其實有D同香港文化冇咩分別, 那當然有D出入好大啦, 今次我想講嘅係====> 禮讓. 土耳其人是以前古代的野蠻民族(Barbarian)即匈奴, 咁係唔係土耳其人真的好野蠻呢? 以我看到的, 可以話.....不如舉個例看看吧!! 在巴士上, 土耳其人一定好禮讓, 如果見到D女士冇位坐, 佢地多數會讓位, 那如果見到D大肚婆, 老人家或有需要人士, 唔駛講啦, 佢地必定讓出個位. 我非常之欣賞佢地這個咁禮讓的行為.

有一次我見到個老人家, 其實佢唔算老, 大槪六十歲左右, 身體好健壯及個子好高大, 當時是放工時間同好擠迫, 佢行到去巴士中央位置時, 用好雄偉的聲音同坐左我對面的哥哥仔話:"比個位"大哥"坐!" (土耳其叫abi=elder brother=大哥), 那哥哥仔真的起身, 比個位佢坐, 在此處, 可以看到有兩點, 第一, 土耳其人的野蠻就在此, 他要的, 他是大阿哥的, 你便要給他,  第二, 哥哥仔真的讓坐給他, 如果比著d香港人, 你話d香港人會唔會咁做呢?

又有另一次, 在地鐵中, 在我前面有位女士突然大聲叫道:" 有個大肚婆係度呀, 你地比個位佢坐啦!" , 兩旁全部人即刻一齊起身給那位大肚女士坐, 係全部喎, 唔係得一兩個人喎,  唔好話, 我初頭有了bb, 肚子已有少少微隆時, d土耳其人一見到我, 已急急的讓位置了, 真的要讚揚吓土耳其人.

講番現在, 其實由我番來香港後, 發現好多香港人已經不同以前了, 非常少去讓坐給有需要的人士,  那當然有些真的好主動讓坐, 不是一定看到在面前的才去讓, 像今天的, 我抱著bb在地鐵中, 竟然沒有人給我位置....

mehmet說道:"點解d香港人唔讓坐抱著bb的人坐呢?"

我答道:"算吧, 我們只乘一個站, 冇所謂啦!"

mehmet回應說:"我覺得我地土耳其人好好多囉!!"

我心想著, 對呀, 你說得對, 越想越憤怒, 想回大槪上個月的時候, 曾有次在地鐵中, 離遠我看到有位女士個肚非常之大, 竟然沒有一位人士讓坐給她, 當時, 我同memet講, d香港人令我好失望, 過了五六個站之後, 跟著我看見有個人將要下車, 我便去叫那位女士去坐, 她說道:" 不需要了, 我都要下車了, 唔該哂!!", 再講吖, 由我陀緊6個月身孕時到我生為止, 當然已經回到香港了, 我的肚子已相當之大, 真的可以數得出,  在這3至4個月裡, 真的沒有太多人讓坐給我, 並不是說他們必須要讓坐給我, 但由此可以看到香港人已經不同以前了, 是不是我太小心眼呢? 還是, 香港人真的不同了呢? 你們又有多少次在巴士或地鐵中, 有讓坐給有需要的人坐呢?

DAPHNE的頭兩個月

時間好快DAPHNE已經兩個多月了, 回想初初她的出現, 第一句在醫院床上同自己講, "呢個BB就是我們的BB呀!你知唔知道爸爸同媽咪等了你好耐啦, 你終於成為了我們的一份子啦!!", 當時個感覺有D奇妙, 有D陌生, 好矛盾!!

講到照顧BB, 真係冇咩經驗, 只是自己細個時照顧過D細妹, 可以話唔係熟手技工,  現在D政府醫院生BB, 順產的話, 數小時後便比番個阿B比自己照顧, 開刀的, 第二日姑娘已經叫我地盡量下床去開始照顧BB咖啦, 例如餵奶啦, 換尿片啦, 都要一一去自己做, 不過, 傷口太痛的, 醫務人員都會拎番個BB出去幫手照顧.

到了開刀第二日, 我真的慢慢起床去下厠所, 行順左便叫姑娘比個BB我, 因為我自己都好想快D掂吓摸吓我的BABY啊, 你知嗎.... 第一次幫BB換尿片時, 個感覺好得意, 有D驚又有D溫馨的感覺, 驚係唔知點換, 溫馨係可以直接觸摸到BB呀!! 那當然是雞手鴨腳啦, 哈哈!!! 跟住, 再抱起BB由頭到尾的凝望著她, 由每一根的髮絲到小小的腳趾, 這小生命帶給我多麼奇妙的感覺, 唔知其他媽咪有沒有我這樣做, 可能你們真的在笑我傻的啊!!!!

之後, 我仲嘗試去餵母乳呀, 因為驚傷口痛, 所以我訓係張床到餵BB, 真係唔知點去餵, 唯有諗番之前上堂時姑娘教過嘅方法去餵啦, 嘩, D感覺超溫馨呀, 一邊餵她, 一邊又一次的看著她, 頭髮, 耳朵, 小口, 眼睛..... 好得意呀, 她是來自我的身體咖, 幻想著她將來可能是一個會串咀的小妹妹呀, 又或者是個很害羞的小女孩啊!!!!

你們看看她的小腳趾, 成隻香蕉仔咁, 多趣緻啊!!

呢張合家相是DAPHNE未夠一個月時, 班舊同事約我出去時影的!!

呢張是我最喜愛的, 當晚在酒樓食飯時, DAPHNE食奶之後, MEMET幫佢掃風時的樣子, 可唔可愛呀!! (未夠一個月)

到第二次出去同另外一班同事食飯時, 又一次見到DAPHNE嘅為食樣!!(未夠一個月)

這張是剛剛夠一個月時影的, 手舞足蹈的叫喊著!!

這張都是剛剛一個月時影, 嗰陣時D皮膚唔係幾好!!

已經個半月了, 已開始幫她練習反身了, 不過只兩三分鐘一次!! 成個"一眉道人"咁

剛剛兩個月了, 開始成個少女樣啦!!

我們的小公主來了!!

回了香港待產都有一段時間, 由八月開始已經等待BB來臨的時刻會怎樣怎樣,  直到預產期九月底都仲未有動靜, 直至十月四日, 要到醫院做催生, 點知.........在醫院等呀等, 一等便等了三天一些動靜都無, 這個小朋友真的有點懶惰, 遲遲都不出來看看這精彩的世界!!

到了十月七日, 醫院方面見到BB的SIZE應是一個巨BB, 所以最後要開刀取BB出黎呀!! 好緊張呀!! 麻醉師來到的時候, 說我的血小板數字不太理想, 本可以半身麻醉開刀, 但最後要全身麻醉呀, 不可以直接看到BB出世的一刻, 有點不開心啊!! 不過, MEMET應該可以看到BB先過我喎, 因為他在門口等緊我倆的消息, 就像人家拍戲一樣, 那麼緊張啊!!

當護士在手術室叫醒我的時候, 我在半夢半醒有點知覺問了他們好多問題:

"BB健唔健康呀?"

"BB係唔係女仔黎咖?"

"有冇比BB我的先生睇呀?"

"BB有幾重呀?"

事後我回想了自己, 真係有點煩啊!!  唔知答我嗰位姑娘有冇覺得呢?

我們這位小公主終於出世了!! 足足遲了半個月呀 小懶豬!!!! 佢個名叫Daphne.

這張相是剛剛出世, 沖完涼之後的第一張照片啊! 勁多頭髮呀!!

來正面一張相吧!  哈哈, 好似識笑咁喎!! 成個男仔咁

這張是第五日影的!!

這張已是兩星期後的照片了!!  樣子現在多少女啊!!

 

我回來了!!!

我回來了!! 希望大家一切安好, 珍惜現有的一切, 開開心心地過著每一天吧!!今天, 我們決定回港生產, 將工作辭去, 安心回港, 一切都是為她去想, 以她為首, 因為她是我們的老大啊!!!!!!

好耐沒有UPDATE個BLOG啦, 真係好懶, 每天安安靜靜地過每一天, 不是吃便是睡, 那當然每一兩天都出去走一走, 運動一下, 我像大部份的孕婦一樣, 帶著一種祈盼又擔心的心情, 等候著小生命的來臨, 那份的感覺, 不能以筆墨能形容, 只有準媽媽或已為人母的才能明白.

祈盼 - 九月廿四日是小生命的預產期, 由八月開始, 已經開始倒數, 日子越近, 心情越緊張, 為什麼還未有動靜, 究竟有什麼先兆呢? ...........究竟她像誰呢? 像我還是MEMET呢? 好希望她似我那樣那樣, 似MEMET的這樣這樣........噢, 預產期將至, 應該買這買那,

擔心 - 時常聽到別人說, 早產, 妊娠毒血症, 妊娠糖尿病, 種種不同, 要介這樣那樣, 對, 我擔心有這個有那個, 有時想想, 不如不想, 不需介那樣那個, 反而每樣平均的去吃, 不宜太多或太少, 對嗎?

土耳其BB(我們的兒甥仔)一歲生日Mevlüt / Mevlit

由五月底至六月尾, 我地會去土耳其的其他城市, 其中一個城市就是ANKARA(土耳其的首都), 原因是MEMET的兒甥仔已經一歲生日, 在回教來說, 初生嬰兒在出生後四十天至一歲期間必須為新生嬰兒做祈禱的儀式, 就好似中國人做滿月酒咁樣, 做呢個儀式土耳其叫做Mevlüt / Mevlit, 是一個宗教為新生嬰兒做的儀式, 只需請人在家中做便可以, 一般是念經文及歌頌, 雖然我地屋企並不是一個傳統回教家庭, 依然住在這裡, 那梗係要入鄉隨俗啦!! 

呢位主角是剛一歲大的土耳其BB, 是MEMET細妹的仔仔, 佢叫Yiğit Eğe, 超得意, 教佢D野, 不出一日便學懂, 例如鍚鍚, 做面部表情的一教即曉, MEMET勁鍚佢!! 

呢件衫仔同褲仔是我買比佢的其中一套, 著了勁醒目!!

講時講, 呢次儀式係請D包頭的女人做, 而男人是不可出席, 小朋友是男的, 當然沒有問題啦, 所以, 我地都要包包頭來尊重呢個儀式, 起初, 她們只將包頭的圍巾, 舖在我的頭上便算, 看看下圖便知, 那是我第一次麻, 當然要影影相啦!! 你地睇下我得唔得? 似唔似回教女人呀? 

之後, 我覺得就咁舖在我的頭上唔夠似, 便用自己方式再包, 哈哈, 我覺得OK喎, 就算喺香港出街包住個頭都幾型吓, 你地覺得點睇呀?

儀式進行時, 比較嚴肅, 其實我想影相, 但要尊重其宗教儀式, 所以沒有這樣做, 儀式進行大概約一至兩小時, MEMET細妹家中邀請了一些女性親友到來, 最好笑的是, 她們都不是包頭的女人, 但當儀式開始時, 都不約而同一齊拿出頭巾來扮靚一番, 儀式進行時, 那做儀式的兩個女人念經文, 歌頌, 還做一些動作, 之後, 我們家中便要準備飯菜來慰勞各位, 其中念經文的一個女人走到廚房加些飯, 你可以從以下圖中見到她的裝扮

看看下圖便知有什麼野食, 有雞肉絲配土耳其飯, SARMA(葡萄葉包飯), Çorek (麵包), Helva (甜品), Ayran (酸奶), 生果 等等食物供應, 

呢碟食物, 我樣樣都鍾意食, 最喜歡就是食甜品 HELVA, 如果唔係, 邊度可以食到我咁肥肥白白呀!!