我的第一次

自己從少已在香港長大, 喜歡香港天氣, 沒什太凍, 只是近新春時才會凍幾天, 可能加上自己喜歡游泳, 所以每次出外旅行, 必定是夏天至秋天季節, 或選擇熱帶地方, 我最怕是冬天, 因為雙手及雙腳都是冰冰的, 所以每逢冬天我最喜歡見到的就是太陽.

初到土耳其的時候是秋季, 涼涼的, 清爽的, 我很喜歡,  冬天剛到, MEMET話這個冬天可能會落雪, 落雪?? 對我來說, 完全是陌生, 因為從來沒有見過雪, 只有在雪櫃才見過, 或是飲凍飲時, 才見過雪, 好多人講落雪的時候是很美麗, 不凍的, 只是溶雪的時候才會凍, 真的嗎? 所以, 我很想在土耳其見到落雪, 因為我是不會在冬季去其他地方旅行, 難得人已在土耳其, 不防看看落雪是否真的很美麗, 我祈待落雪的感覺, 真是又愛又恨.........

上星期, 新聞報導話ISTANBUL可能在某些地方會落雪, 好祈望可以在家門口看看, 但是一丁點也沒有, 只聽到有位朋友住在ULUS附近見到落雪, 唉!! 唔知要等到幾時才見到落雪呢??

就在今天2008年12月29日下午6時35分,  在這個時候, 我是開始我的工作, 煮飯, 咁由廚房窗口望出去, 心想, "唉!! 又落雨!! 至憎!! " , 但由微弱的街燈望去, 為何D雨咁大粒嘅?? 唔通係D塵黎嘅?? 冇理由係D塵黎喎!!　OH MY GOD!!! 唔通係.......即刻飛奔去攞相機同去露台看看先！！

我的第一次在家的露台見到雪啦, 我像小孩一樣，仲用手去捉Ｄ雪，你地睇吓，可能你地都見過雪，覺得冇咩大不了，但是，我相信，你地的第一次應該同我差不多，都係興奮到飛起，像小孩一樣在玩雪，　對嗎？　

你地話啦! 似唔似D塵先!!

仲好鬼死大粒呀!! 一舊舊.....

成個天都係呀!!

呢粒仲大到, 影出黎, 仲影到好似個月光咁樣!!

當時, 好想即刻話比MEMET聽, 我見到落雪,但因為佢係電視台, 收唔到電話, 咁就話比MSN D 朋友聽啦, 點知, 嗰個時候, 只有上次見過面的PHOEBE 在線上, 咁就同佢講啦, 你知唔知佢點回應我呀: '係呀!! 咁你玩一陣好啦!! 千祈唔好唔記得煮飯呀!!傻婆' 係喎, 我真係要去煮飯啦, 好彩有佢提醒左我

真係好大粒, 好靚, 好浪漫呀!! 最衰我個HONEY唔係身邊, 又唔係在早上有太陽時落, 如果係, 呢個世界實在太完美啦!!

你地嘅第一次睇雪嘅心情是怎樣咖？？

點黎我土耳其屋企

其實而家喺土耳其都識左唔少朋友, 好多時如果佢地冇地方落腳, 都叫佢地黎我家住幾天, 如果你地有朝一日真係黎ISTANBUL, 而又想慳D租金, 又唔怕離市區太遠的話, 我唔介意你地黎我家住喎, 最多你將慳左嘅酒店錢黎請我食飯囉, win-win situation 嘛!!

可能你地話為何我要住咁遠, 其一, D租金便宜, 其二是, 人流冇咁復雜, 其三是, 又聽唔到D回教徒零晨五點去朝拜嘅聲音, 環境又唔錯, 又加上我老公返工搭車只是廿分鐘車程, 所以就搵到而家呢個屋企啦, 唔好話, 我隔離嗰D係獨立屋黎, 都幾貴咖!! 因為我屋企行三分鐘便到海邊啦, 有時都有同我老公行吓Sea side 浪漫吓!!

如果你地黎我屋企, 又知道Taksim 喺邊, 其實好易黎到, 土耳其有好種交通工具, 其中一種係Metrobus, 呢種Metrobus都幾方便, 因土耳其成日都塞車, 所以如果搭佢, 仲好過有私家車, 皆因土耳其政府見咁鬼塞車, 佢地喺公路上開多條綫專比Metrobus行駛, Metrobus同香港地鐵一樣, 暢行無阻, 因為得佢一架車行, 完全唔怕會塞車, 又安全, 又快, 車資只是1.5Lira=8HKD, 不過, 無論你搭一個站又好, 搭全程都好, 都係一個價錢, 唔公平!!!另外, 最好係佢係廿四小時, 最啱我呢D夜鬼, 不過, 好似零晨一點後就係一個鍾頭只有一班車.

睇吓, 成條街都只係得Metrobus行, 唔似隔離條綫咁多車, 而家係下午, D車已經冇咁多, 大約到五點開始, 車龍好似由太子塞到去尖沙咀咁長, 都唔知點解土耳其咁多車輛

由頭到尾只有廿五個站, 全程38分鐘,當頭站是Avcılar, 尾站便是Zincirlikuyu, 如果黎我屋企的話, 麻煩喺İETT Kampı站下車, 即係由頭數起第三站便是, 之後再步行十五分鐘便到我家, 咁當然, 我會黎車站接你地啦!! 如果再直去, 去到尾二站Medickiyeköy便可在此處轉地鐵(即係Şişli站), 兩個站之後便去到Taksim啦!!

佢個牌都寫明全程只需38分鐘... 都幾快咖, 時間好似由荃灣去尖沙咀咁啫!!

有日,夜晚跟MEMET出去TAKSIM見佢D  朋友, 回程時坐METROBUS, 悶悶地便想望出去, 點知嘜都睇唔到!!因為裡面熱, 出面凍, 所以塊玻璃濛查查, 跟住, 我便在玻璃上寫了D字, 嘻嘻!! 你地睇吓!!

MEMET問我係咩野字, 我同佢講, 佢笑到見牙唔見眼!!  因為我教過佢點讀, 所以佢知點解!!!希望冇土耳其人識睇中文啦, 唔係大鑊啦!!

仲有呢兩個字!! 最好笑係D車裡面D人唔知我寫咩吖嗎!! 哈哈!!自得其樂又一日....

土耳其的同鄉(二)

經J認識了剛到安哥拉(Ankara)住三個月的Phoebe, 佢十一月底已經到了土耳其, 而今次佢專程來Istanbul探探朋友, 順道來同我打個招呼, 今次亦是我自己第一次出咁遠街, 因為每次都有Memet陪我, 但因為我們見面是下午, 又因Memet要返工, 所以自己出街見呢位同鄉啦!!

今次我同PHOEBE連續出左去兩天, 第一天係去TAKSIM, 就去左一間Cafe試Salep, 果然係好好飲, 原來出面D Cafe係將D熱奶發起泡, 當飲入口時有熱嘅泡沫入口, 果感覺果然好得意, 之後, 我仲番屋企學點整, 果然有95分, 仲越黎越鍾意飲Salep......Phoebe都有試Salep, 佢都係第一次飲, 佢都覺得OK咖, 呢日我好開心, 因為可以飲到Salep, 又加上Phoebe個人好風趣, 每當我倆講起有關在香港或土耳其一D風趣事情, 就不其然, 好大聲咁笑左出黎, 周圍D人仲不時回頭望吓呢兩個傻婆做咩咁大聲.... 仲失左少少儀態Tim

而第二日我地就去左Eminönu一間叫Fish point嘅餐廳食Lunch. 間餐廳喺去Karaköy條橋下面嘅近中間位置, 而我地坐近窗口位, 可以望到一些大船或小船行過, 仲有一些雀烏飛來飛去, 再加上餐廳情調一流, 又有些Romantic嘅音樂, 手上拿著暖暖的紅茶, 口中品嚐著地道的土耳其菜, 令到心境非常愉快及平靜, 那當然今天我倆沒有在餐廳大笑, 因為要保持儀態嗎!! ....仲有樣野, D人覺得我十足十係中國人, 而覺得Phoebe唔係好似, 緊係啦, 你地睇吓, 我地兩個頭嘅顏色完全好大對比, 一個黑蚊蚊, 一個金金地

 

我地叫左一碟雞肉及魚, 這雞肉有點失水準, 只有燒烤的味道, 可能土耳其本身進食前才加鹽, 所以我覺得麻麻地, 如果我煮的話, 水準應該好過佢地,

另外, 碟魚就真係唔錯, 肉汁依然存在, 沒有流失魚的水份, 水準十足, 仲好嫩滑, 唔錯!!! 土耳其人本身好喜歡將魚拿去燒烤或煎炸, 完全是沒有香港的蒸與炆!!  唔好意思, 切左條魚才記得要拍照啊!!

這間餐廳有一流的熱情招呼, 完全可以拋下一切煩惱, 盡是在這裡享受美食, 如果可以, Phoebe話真的可以坐在那裡坐足十個鍾也不覺得悶, 我也覺得啊!!! 呢位係餐廳內的侍應, 也來拍個照!!!

之後, 我地仲去左TAKSIM行街, 行得累了, 便坐下飲吓茶, 捉吓棋!!

手上拿著的便是土耳其人好喜歡玩嘅棋, 我唔記得叫咩名, 等我下次問吓老公先!!

這兩天, 我好開心, 因為有同鄉Phoebe同我一齊周圍去, 佢仲話可能下個月再來玩幾天, 好祈待呀!! 另外, 我也認識了怎樣去乘坐一些不同的公共交通工具, 遲D介紹吓土耳其D交通工具同地區比你地!!

================================================================

Tavuk = 解作Chicken.    讀音Ta-wood-k

Balık = 解作 Fish.  讀音 Ba-luck

Lokanta = 解作 restaurant.  讀音 Lok-counter

土耳其嘅特飲 - SALEP

好多謝WANDA話比我聽呢個土耳其飲品, SALEP, 原來只有冬天才有, 好多時係D CAFE到必定搵到, 但本人好少出街, 便話比HONEY聽是否可以自制, 原來係SUPERMARKET係可以買到盒裝的, 你地睇吓個樣得唔得? 那當然這必定是甜的, 因為土耳其人超鍾意甜食!!

開包裝後, 原來個樣好似一般的糖, 我加入兩至三匙SALEP粉, 之後, 加熱水或奶都得, 那當然用奶是最好的, 勁攪, 但當然, 發唔起D泡沫, 可能出面D人加了D CREAM在上面, 同上圖一樣.

之後再加上這啡色的粉在面, 有D似咖啡粉, BAHARAT=SPICE 即香料或調味品. 此香料,調味品原來是肉桂粉, 可以加入一些菜裡面, 不過, 我未試過....

出黎嘅樣唔差咖, 不過, 味道一般, 有D似杏仁茶, 好滑, HMMM.... 我諗我會出去CAFE到試真D係唔係唔同自己整的, 同時, 可以問吓有D咩秘技.....到時再話比你地聽呀!!

自己整, 分數只可以比70分, 剛剛合格多DD.

冬天已到, 有呢樣熱飲都唔錯, 起碼唔駛淨飲茶咁悶, 滑滑地, 又可以滋潤喉嚨!! 

土耳其的宰牲節/羔羊節 Kurban Bayramı

這幾天是土耳其的古爾邦節(宰牲節/ 羔羊節) Kurban Bayramı, 宗教節慶 4-7天,  所以MEMET可以有假放, 亦是我放假, 因為佢話若果是假期, 所有煮食都是由佢負責,  我覺得我好幸福啊!!!

(宰牲節/ 羔羊節) Kurban Bayramı 是全世界伊斯蘭教一年一度的盛大節日,主要是可以屠宰牲畜來給予一些貧窮的人或饋贈親友, 就像我們中國新年一樣, 會去一些親友家探望, 而佢地會好似我地咁講一句說話: IYI BAYRAMLAR (意思: 節日快樂) 同新年見到人就講恭喜發財差不多, 講回禮物, 而我家當然沒有宰殺任何小生命, 如果有親朋戚友來探訪, 我們會買一些糖果代替羔羊來饋贈, 多好!!  

而昨天, MEMET做了一款甜食來代替糖果, 我好喜歡, 皆因它很像朱古力, 而我一向不吃朱古力甜食, 但吃來很有趣, 我想跟你們分享分享. 這是由橙甘筍甜食Havuç tatlısı, 主要材料有:

橙甘筍 五小個

紫甘筍 三小個 (平時佢只用橙甘筍, 不過, 佢想試試加紫甘筍是會怎樣, 他說效果非常好, 當然, 你們沒有紫甘筍, 而又想有朱古力之感覺, 便可用朱古力餅乾, 若只用橙甘筍, 出來之效果便是橙色)

餅乾      一包

糖          一杯 (視乎個人口味)

水          少許

先將餅乾弄碎, 多少要視乎你用了多少甘筍

可以有些少不用太碎

當然, 在弄碎餅乾之同時, 我們要將甘筍弄碎成絲狀, 後加入煲內加水及糖煮至軟身, 當水已乾身時, 相信甘筍已非常軟身, 之後倒入餅乾碎內,

之後將它們混合搓均, 感覺有黏性, 像麵粉一樣....

之後舖平在碟上或搓成球狀, 隨你喜歡,

我們還加了一些椰絲在面,

 

後將之放入雪櫃大約半小時至一小時, 便成美味的甜食了!!

在這兩天是節日, 應有客人來探訪, 我們便將之切成小塊讓他們品嚐!! 我們將紫甘筍加入, 外型真像朱古力, 又好味又有口感!!   

Havuç tatlısı

Havuç = Carrot 甘筍, 讀音: 夏-WOOD-T

tatlısı = desserts 甜品, 讀音: TAT-拿-時

iyi bayramlar

iyi = Good, 讀音: 依-儀

bayramlar = festival, 讀音: by-ram-la-sh