土耳其的芝士春卷(Sigara Böreği)

上次曾經介紹過土耳其的芝士春卷(Sigara Böreği), 今次再次介紹, 點解? 皆因, 今次係自己親手做, 以前不嬲都是在超市買盒回家, 都可以分兩餐食, 但之後我老公話其實超易整, 不如試吓自己做, 因佢見過佢媽咪以前做過, 咁我就走去超市望望, 果然比我發現在冷藏櫃有酥皮賣喎(土耳其文叫Yufka, 英文叫 Pastry), 一包酥皮都有成30-40張, 只賣1.50Lira (約港幣7-8元), 嘩, 好抵呀

而碎芝士(Böreklik peynir), 只賣2.50Lira(約港幣13元), 其實唔駛集中攞黎做幾十條芝士卷, 因為一盒實在太多芝士啦, 平時可以攞黎加落D意粉面到, 又可以攞黎炒蛋食, 極多用途, 以我今時今日嘅地位(即煮飯婆), 當然要資慳識儉啦, 係咪!!

材料:
酥皮
碎芝士
少少生粉水/麵粉水/蛋汁

做法:

1) 取出一塊薄薄的酥皮, 本身已切好成三角型, 不過我唔知香港係咩型, 可能係正方型, 無所謂啦, 最後都係卷成一條條狀

2) D芝士係碎成小粒狀, 只需要一匙羹便夠一條芝士卷啦, 出去買一盒果D每條可能最多得四分一匙羹咋, 諗諗吓, 自己蠢左成半年TIM, 心有D不甘

3) 之後, 均勻向橫放落酥皮上

4) 之後, 將左右向內摺, 不讓芝士掉出

5) 跟著便將它卷埋一條將手指段粗的條狀, 其實不需卷得太實, 因為塊酥皮好薄, 好易爛開,

6) 之後, 卷到尾, 點少少生粉水/麵粉水/蛋汁在三角的尾部, (那當然用生粉水/麵粉水比較經濟啦),  咁樣, 就好易黏實

不出, 三四分鐘便卷成十條啦!!

7) 之後, 放落油炸或煎, 不過, 我會落少半油黎半煎炸,

8) 待酥皮變成金黃色便成, 不過, 一定要點原味YOGURT食至最好味!!

非常好味又易整, 只是廿元港幣, 便可以享有超過30條嘅鬆化黃金芝士春卷, 由卷至炸完的時間只需十至廿分鐘, 當然視乎你整幾多條, 因為卷一條都唔駛一分鐘, 真係MEMET話齋, 超級易整, 完全啱哂我呢D又孤寒又要快又要便宜又要好味嘅香港人啦

==================================================
Yufka (Pastry) 酥皮( 音: Yu-f-ka)
Böreklik Peynir (shattered cheese) 碎芝士 (音:Bur-rek-lik Pay-neer)
==================================================
後補:
經網友提醒後, 發覺D 芝士是羊奶芝士feta cheese, 但唔知係唔係, 因我本身唔食羊, 所以有待考究, 但我有查過字典, feta cheese 可以叫做白芝士, 其實, 如果你地做的話, 可以搵D唔會溶嘅芝士, 因為落油炸完, 都唔會溶咖!!

土耳其春捲Sigara Böreği及土耳其青口包飯Midye pilavı

有個BLOG友- 噢! 地利 ..Oh!tria 對土耳其食品好有興趣, 前一排佢喺奧地利維也納的某間專售土耳其食品的商店買左包類似Sigara Böreği 煙仔酥皮春捲點心, 個樣好似香港嘅春捲點心, 但係煮完之後有D唔同土耳其食品, 皆因佢話炸完之後, 個皮唔脆, 入面又冇"函", 所以今次我寫特意介紹一下.

呢隻Sigara Böreği 煙仔酥皮春捲點心本身可以在普通的超市買到, 價錢是2.75lira一盒, 大約港幣15元左右, 每盒裡面有20條煙仔春捲, 雪在冰箱裡頭, 如果食時, 不須溶雪, 便可放進PAN入面炸, 約三份鐘左右, 炸至金黃色, 盛起隔油上碟即成, 食法是與YOGURT一齊同食, 好多時我會點到成支煙仔春捲都係YOGURT先食, 非常好味, 我個人認為因為YOGURT本身淡淡地凍凍地, 與之同食可帶出芝士香味, 又可以減低炸後產生之熱氣, 每次最少食兩條, 有時一次過會食成四五條, 我老公仲勁, 佢每餐可以食成八九條, 但我驚太熱氣了, 我只批准佢每次最多食四條.    

炸完之後便是這樣子, 好脆好鬆化, 裡頭D芝士咸咸的, 點YOGURT食, 超正, 之前上次Ginnie有問過點解唔點千島醬或其他沙律醬, 一定要同YOGURT一齊食, 因為YOGURT冇味, 咁我就比碟千島醬比佢點黎食, 食後佢都覺得點YOGURT好味D, 皆因, YOGURT同芝士同種, 同埋YOGURT完全帶出芝士嘅香味, 而千島醬將芝士味道覆蓋哂, 食後完全唔覺有芝士味道, 只有千島醬及酥皮味, 不過, 唔同人有唔同口味, 可能有D人真係當佢係香港點心, 用黎點唿汁食呢!!

其實如果可以, 自己去街市買D酥皮番黎, 再買隻碎粒型嘅芝士粒, 不過呢隻芝士放落油係唔會溶嘅, 不過我唔記得個名係咩!! 有待下次告之, 咁之後就好似包春捲咁包, 落鑊, 盛起, 隔油, 食得, 點醬, 超易!!

你地見唔見到真係有碟仔係千島醬呀? 我就係比左D呀Ginnie試食呀, 不過我就用黎點右上角嗰碟腸仔嘅..... 而隔離嗰碟係Midye Pilavi 青口包飯, 可能你地會覺得, 吓!! 點包呀??青口喎!! 話你聽, 呢個小食超好味.

呢個小食其實多數你會見到D小賣檔有得賣, 有時有D賣海鮮餐館都有得賣, 價錢約0.5lira一隻, 大約港幣3元到, 多數一次過最少我都會買十隻以上, 買時佢地會比埋舊檸檬, 不過, 好多時, 一舊檸檬係唔夠我老公食, 我會預定D檸檬係屋企, 佢食親都會用兩個檸檬或以上, 超級檸檬怪, 好彩佢唔係請我食啫, 而我多數都去D餐館買, 你地知啦, 香港教育我地海產食品要去有註冊嘅商店先好買, 不過, 我見好多土耳其人都係就咁喺D小賣檔前一隻一隻咁食, 個檔主仲幫D人一隻一隻咁滴D檸汁, 食完一隻再比一隻, 賣相都幾得意!!

呢次我就買左十四隻, 都成7lira, 不過, 如果你地黎土耳其必定要試下, 味道酸酸咸咸的, D飯又lim lim 地, 好好味!!

呀!! 唔記得講嘅係, 入面個青口只是得剩番一塊皮仔, 就好似下圖一樣, 並沒有其他啦, 其他D肉就唔要咖啦, 佢地話果D係唔食得喎, 因為佢地話其他D肉污穢不堪, 所以掉哂, 唔係麻, 得番塊皮, , 唔似我地香港咁, 除了個殼之外, 全部D肉幾乎都食哂, 不過, 我諗深入D, 其實可能有D商人收集哂其他D肉去再造其他用途, 有咩可能掉哂先 

另外, 佢地食時是有個方法, 先擳一些檸汁落D飯到, 好似食生蠔咁, 之後就將另外冇野嘅殼掘起有飯的那個殼底, 即由D飯嘅底部掘起, 咁樣, 成舊飯就會好容易咁掘起左出黎, 之後就放入口食啦!!! 真係好好味咖!!!

=======================================================

Sigara Böreği (deep fried rolls with cheese filling)   煙仔酥皮春捲點心

Sigara (cigarette) 香煙 (音: Ci-ga-ra)

Böreği (pastry) 酥皮 (音: Bur-re-ee)

=======================================================

Midye Pilavi (mussel stuffed with rice / pilaf)青口包飯

Midye (mussel) 青口 (音: Mi-d-ye)

Pilav (rice / pilaf) 飯(調味料煮成) (音: pill-af) 同英文pilaf讀音一樣

=======================================================