土耳其的焗薯(Kumpir)

在香港時，不嬲都對薯仔情有獨鍾，例如：薯條，薯仔炆雞翼，薯蓉，蕃茄薯仔湯，，等等。而我Honey都好鍾意食薯仔，最記得佢去香港的時候，呀媽擔心唔知整咩餸比佢食。

呀媽就問我：＂Memet鍾意食咩餸呀？＂

我隨口答：＂是但啦！佢應該咩都食掛，佢都未正式試過廣東菜！同平時屋企食一樣未得囉！＂

呀媽：＂好啦，不過，炒多個薯仔比佢食囉？佢Ｄ鬼佬都係鍾意食薯仔咖啦！如果Ｄ廣東菜唔啱佢食，起碼都仲有個薯仔啱佢食啦！＂呀媽果然照顧周到。

之後，我呀媽仲話：＂原來Memet都幾易養喎，一個薯仔攪掂佢喎！＂比呀媽笑死我

而家喺土耳其都有時係屋企整薯仔食，由其係焗薯，土耳其叫做Kumpir,　非常好味，如果出街食大約6 lira一個餐（約32-35蚊港幣）一個焗薯+一杯茶或汽水，佢地係用D好大個薯仔, 最少都有成6吋大, 其實好易做, 咸料同Pizza一樣, 任你加, 冇咩所謂.

基本材料:

1) 薯仔- 最好有咁大買咁大,

2) 牛油

3) 芝士碎

4) 茄汁

5) 沙律醬(Mayonez)

6) 錫紙

咸料: (任你咩都得, 如果要同土耳其一樣, 咁就同如下所示, 因為我都係咁做)

橄欖切粒,

腸仔(我提議最好切片同煎吓佢),

洋蔥切粒, 甘筍切粒, 青椒切粒, (我提議最好炒吓佢, 加少少鹽兜一兜)

粟米粒

一D青菜沙律

其實仲有好多種咸料, 以上只是介紹一部份，而呢個就係我出街食時影嘅!

做法:

1) 首先, 將D薯仔洗乾淨, 唔駛去皮, 用水煲佢十五分鐘左右, 至後, 取出,

2) 將佢用叉吉下個皮, 因為焗時個薯仔唔會爆開, 之後,

3) 用D橄欖油(或普通油)搽下個皮, 等佢焗時潤D, 唔會乾, 之後,

4) 將D錫紙包住佢, 入焗爐焗45分鐘,用200度

5) OK 之後, 便在中間介開, 將頭尾向內推入, 因為個口會開大D, 方便加餸, 再用刀將入面D薯仔肉攪爛, 變成薯蓉

6) 加牛油及芝士碎, 將之與薯蓉混合（我自己會加好多牛油同芝士，一來自己鍾意食，二來，我喜歡每一啖都有芝士絲，哈哈！）作用是令個薯蓉有味

7) 咁之後, 隨你喜歡加咩咸料在內都得,如上舉例

之後, 在面加上沙律醬同茄汁, 不過, 好多時, 我都係一邊食, 一邊加餸, 一邊加醬汁, 以下, 就係我平時係屋企做嘅成品啦!! 味道同出街食一樣, 成本只是大概港幣十元, 好味同抵食, 所以每個星期都會喺屋企整比HONEY食, 而家我地都唔出街食, 因為自己識整嗎!! 　你地覺得似唔似呀？我自己比自己都有100分，點解滿分？皆因，可以隨時加餸囉！因出街只可以加一次咋！

如果黎土耳其，Taksim有好多店都有得賣，真係直得一試，一個薯仔就可以好飽咖啦！！

===================================================

Kumpir (Baked Potato) (音 : Kum - pir)

Patates (Potato)  (音 : Pat - ta -tes)

Tereyağı (Butter) ( 音: Ter-re-ya-ai)

Peynir (Cheese) ( 音: Pe-ni-ir)

Zeytin (Olive) ( 音: Ze-tin)

Ketçup (Ketchup) ( 音: 同英文一樣)====================================================