現在土耳其的天氣比較好, 因為春天已到, 大地一片青綠, 土耳其的四季比較分明, 春天周圍都有花開, 而我屋企對出棵樹都出芽啦, 夏天超級晧熱, 不過, 都好有風, 唔似香港一滴風都冇, 仲要熱得黎濕TIM, 難搞!! 秋天清風送爽, 完全像香港冬天, 勁大風, 而 冬天就凍到僵
...... 所以, 襯近排天氣溫暖一些, 便出外行行, 由於屋企行出去海邊只須短短兩分鐘便到, 便常常到海邊散步, 吹吹海風!!
由海邊回望番屋企, 中間燈柱近左邊嗰間橙色屋便是我屋企啦!! 見唔見到呀? 不過, 我屋企係住三樓, 平時在露台係見唔到個海, 如果住四樓, 就正囉!!
有好多人都襯天氣好, 出外行行!!
D海水仲好清澈呀!! 我仲成日落黎呢度執石仔同貝殼返屋企咖!!
行過D, 仲見到D草已經長了很多啦!! D樹都開始萌芽了!!
我地兩條友仔仲喺D茶座度坐低飲吓野TIM!!
其實香港如果可以好似咁樣, 你話幾好呢!! 最衰係太多高樓大厦, 香港人放假寧願在家休息, 你話冇壓力都幾難!! 除非去旅行啦!!
在海邊D草地, 發覺好多人都BBQ喎, 咁之後, 就同MEMET兩口子便去買了一個小小的爐, 諗住在屋企露台BBQ啦!! 行行吓, 我地仲係超市附近見到棵樹好似梅花樹, 有白色同粉紅色的, 真係好靚咖!!
我真係覺得佢好似中國D梅花呢!!有冇人識得睇花呀? 點解土耳其會有中國梅花嘅?
呢晚BBQ有雞翼, 蘑姑, 腸仔, 青椒, 同新薯, 正!! 當然, 新薯唔係攞黎燒啦, 係烚黎食!
佢地土耳其人燒野食並唔係一人一支叉咖, 而係一個人燒哂!!完全唔同香港的形式, 講真, 我比較鍾意香港嘅BBQ形式, 可以慢慢燒, 有傾有講, MEMET之前去香港時, 都試過香港BBQ形式, 佢都話佢鍾意香港BBQ形式, 因為可以燒幾多食幾多, 而土耳其BBQ係一兩個人一次過燒哂D野先黎一齊食, 所以話呢, MEMET已經係半個香港人啦
, 就算我地想用香港形式去燒都冇用, 因為冇叉用, 唔係, 應該係冇叉賣!!
仲有, 佢地D炭係一粒粒圓形, 佢話呢D好D喎, 唔知香港有冇呢種炭呢? 你地知唔知呀?
嘩!! 燒雞翼, 
我最鍾意食!!隔離嗰包係牛油蘑姑, 正!!
我都話啦, 唔用叉黎燒, D野食好易燶咖嗎!! 
你地睇吓MEMET, 幾比心機喺度慢慢燒呀!!
講樣野你地知, 新薯加芝士超正, 平時MEMET嘜野"皮"都唔食, 我用CREAM CHEESE加在D新薯上面, 佢試完之後, 話D皮都好好味!! 嘩, 完全可以一人食成五六個囉!! 其實最好用有蒜蓉嗰隻CREAM CHEESE!! 我有個香港朋友勁推介囉!! 你地試吓買黎試吓啦!!
終於燒好啦!! D青紅椒, 最好要撕開D皮黎食, 好甜好JUICY!!
諗諗吓, 我走去搵番三年前D相, 果次同MEMET D 土耳其朋友一齊去BBQ, 都好正!!地方完全係好靚, D樹仲好高好大棵!!
你地睇MEMET三年前個頭係味好似McDonald叔叔呢!!其實, 佢冇GEL頭咋, 哈哈!!
我地仲見到有馬騎, 我仲走去玩吓騎馬仔TIM, 白馬皇后駕到!!
Canan 就係呢個土耳其女仔, 佢仲整左D土耳其沙律, 又係好好味!!另外個位, 係佢現在老公啦!!
呢個土耳其沙律其實係就咁用D雜菜, 洋葱, 青瓜, 青椒同蕃茄加埋D檸檬汁, 再加少少鹽, 咁就得啦!! 好有自然風味!!
========================================================
Mangal (barbecue) 燒烤(音: Mang-g-al)
Deniz kenarı (Seaside) 海邊(音: Den-niz ken-na-ree)
At (horse) 馬(音: art)
Mevsim (season) 季節 (音: Mer-v-sim)
Salata (Salad) 沙律 (音: Sa-la-ta)
========================================================
