新年FUSION - Taze Fasulye Recipe

首先祝各位新年快樂, 青春常駐, 長搵長有, 心想事成!!

不經不覺, 回來了成大半年了, DAPHNE都已經四個月啦!! 生活一切正常, 食方面對我來說, 去到世界邊度, 我都OK, 因為我係垃圾桶, 咩都可以擺得入口. 但是, 對土耳其爸爸來說, 中國食物麻麻地, 最好餐餐PIZZA同老麥, 呢D食物對中國人來看是沒有益的, 現在對他來說, 便好似我地見到鮑魚, 燕窩咁, 咁好味!!

你地知嗎!! 大年初一, 對中國人來說當然係食齋啦, 但是當日有個奇景, 便是我地一家人當然食齋食蘿蔔糕啦, 而土耳其爸爸同呀法國仔(我細妹的男友), 佢地兩條友仔在枱的另一邊食TOAST鮮油多士, 哈哈, 完全有FUSION感覺, 好得意!!而我個小姪仔, 都食埋一份, 一食食幾件, 冇佢符.

現在在家中, 土耳其爸爸都會整吓土耳其食物來安撫吓佢自己對土耳其食物的懷念, 好啦, 等我今日介紹吓呢款土耳其菜, 你地都可以在家試試, 唔錯, 幾好味喎!

茄汁四季豆Taze Fasulye

材料(二至四人份量):
一札               四季豆(切段)
半個               洋蔥 (切碎)
一個               蕃茄(切粒)
三匙               茄膏
兩匙               油 / 橄欖油
一兩小粒       蒜頭 (切碎, 可加可不加)
一杯250ml      熱水
少許/一小匙  鹽(隨各人口味)    
一小匙          辛辣粉(隨各人口味) <-- 特別在此, 因為食下去, 才感覺有土耳其菜的味道  

四季豆(切段)

洋蔥 (切碎)

蕃茄(切粒)

辛辣粉(隨各人口味)

煮法:
1) 先下油加熱, 後將洋蔥加入鍋中, 炒至全熟及金黃

2) 再下四季豆入鍋中, 炒至豆變深色,

3) 再下蕃茄入鍋中炒

4)再加入250ML熱水入鍋中

5) 後加三湯匙茄膏

6) 再加入辛辣粉入鍋中, 蓋鍋蓋煲十至十五分鐘, 至蕃茄融化,

7)煲至四季豆已全熟及蕃茄已融化, 而水已收了不少而成汁, 加入鹽, 便成

成品

用另一個角度看看

本身要多汁, 因土耳其人喜歡點長麵包食, 而我自己都喜歡加白飯食, 少少辣, 好好味!! 不防試試, 不過, 自己認為, 可以加少少牛肉碎或豬肉碎, 完全有中土FUSION感覺.

土耳其BB(我們的兒甥仔)一歲生日Mevlüt / Mevlit

由五月底至六月尾, 我地會去土耳其的其他城市, 其中一個城市就是ANKARA(土耳其的首都), 原因是MEMET的兒甥仔已經一歲生日, 在回教來說, 初生嬰兒在出生後四十天至一歲期間必須為新生嬰兒做祈禱的儀式, 就好似中國人做滿月酒咁樣, 做呢個儀式土耳其叫做Mevlüt / Mevlit, 是一個宗教為新生嬰兒做的儀式, 只需請人在家中做便可以, 一般是念經文及歌頌, 雖然我地屋企並不是一個傳統回教家庭, 依然住在這裡, 那梗係要入鄉隨俗啦!! 

呢位主角是剛一歲大的土耳其BB, 是MEMET細妹的仔仔, 佢叫Yiğit Eğe, 超得意, 教佢D野, 不出一日便學懂, 例如鍚鍚, 做面部表情的一教即曉, MEMET勁鍚佢!! 

呢件衫仔同褲仔是我買比佢的其中一套, 著了勁醒目!!

講時講, 呢次儀式係請D包頭的女人做, 而男人是不可出席, 小朋友是男的, 當然沒有問題啦, 所以, 我地都要包包頭來尊重呢個儀式, 起初, 她們只將包頭的圍巾, 舖在我的頭上便算, 看看下圖便知, 那是我第一次麻, 當然要影影相啦!! 你地睇下我得唔得? 似唔似回教女人呀? 

之後, 我覺得就咁舖在我的頭上唔夠似, 便用自己方式再包, 哈哈, 我覺得OK喎, 就算喺香港出街包住個頭都幾型吓, 你地覺得點睇呀?

儀式進行時, 比較嚴肅, 其實我想影相, 但要尊重其宗教儀式, 所以沒有這樣做, 儀式進行大概約一至兩小時, MEMET細妹家中邀請了一些女性親友到來, 最好笑的是, 她們都不是包頭的女人, 但當儀式開始時, 都不約而同一齊拿出頭巾來扮靚一番, 儀式進行時, 那做儀式的兩個女人念經文, 歌頌, 還做一些動作, 之後, 我們家中便要準備飯菜來慰勞各位, 其中念經文的一個女人走到廚房加些飯, 你可以從以下圖中見到她的裝扮

看看下圖便知有什麼野食, 有雞肉絲配土耳其飯, SARMA(葡萄葉包飯), Çorek (麵包), Helva (甜品), Ayran (酸奶), 生果 等等食物供應, 

呢碟食物, 我樣樣都鍾意食, 最喜歡就是食甜品 HELVA, 如果唔係, 邊度可以食到我咁肥肥白白呀!!

土耳其燒魚 (Mangal 燒烤)

講起食魚， 我並不是專家，但我是出生在一個漁港城市 – 香港，唔係專家, 都可知道有咩煮法，香港人可以話係多樣化，有蒸，煎，炆，炒，燒，等等。不過， 比較多人食蒸魚， 貪其可食出魚的新鮮味道，就算蒸，都可加入不同食材以令多樣化，可清蒸，豆豉蒸，麵豉蒸，蒜茸蒸，酸筍蒸，可以話各式各樣，因為懷孕期間，要多食魚, 但不能吃深海魚, 魚肉蛋白是優質蛋白，氨基酸的含量高，特別容易吸收，所以對胎兒生長發育是很好的，因此應多食魚。

在土耳其，我會選擇鱸魚（英文：Sea brass, 土文：Levrek）來食，鱸魚含優質蛋白質，低脂肪，健脾利水，補肝益腎，有安胎的作用。其實Memet並不喜歡食魚，怕D魚腥味，但佢話為了Baby，他可嘗試去食，嘩！！我都冇咁好吸引力令佢食魚，反而一個素未謀面的傢伙可以，有點妒忌TIM！ 

在香港時候，只有父母做菜，所以根本唔識得點整Ｄ魚，我個人認為蒸魚是可以食到魚的鮮味，黎到土耳其發覺佢地整魚方法不離燒，煎及炸，眼看佢地根本唔識做魚，這樣的做法已經沒有了魚的鮮味，因為佢地唔會蒸。加上佢地食的是冰鮮魚，沒有了我們港人見到魚游緊，先至叫好魚，佢地話我地殘忍，係咩，我唔覺喎！

MEMET去了魚檔買了兩條魚，價錢約１３Lira（即約６５元港幣），佢又問老闆有關鱸魚的做法，回家便有樣學樣的做，佢買了炭來燒，我好懷疑究竟好唔好食，唉！心想唔好食都要食，因為唔想破壞佢一番心機和這次是他提議食魚先，好少有........

首先，他將魚洗好，之後在枱上舖上一張大的保鮮紙，放魚在保鮮紙上，然後，用一隻碟仔加上橄欖油，黑椒粉，鹽，薄荷粉，紅椒粉，檸汁及一些辣椒粉，然後搽上兩面全條魚的魚身，之後在魚肚中放入數塊香葉來防止有魚腥味，用保鮮紙包好，放入雪櫃待３０分鐘或以上，便成。之後，佢便走到露台預備炭及火，火不用大，他們用的是我們燒完後的火種來做，我們香港人燒野食時，見到火越猛越好，土耳其剛剛相反。３０分鐘以後，便取出魚放在鐵網上，臨燒前在兩面魚身放上香葉來燒，一會兒，約十分鐘左右便成了。

當看見他的製成品，去了魚皮之後，嘩，原本燒魚都食到魚的鮮味，好有汁及魚香味，真的好好食呀！！

當晚，我還做了壽司飯，仲加上了數張紙菜在面

300克白飯加入一湯匙的壽司粉末

一啖魚肉放在壽司飯上，加上少許醬油，嘩！極品吖！完全覺得食緊日本餐呀，不過，Memet覺得我的食法唔好食，佢只在魚身上加上檸汁來吃。

我想，日後回港都要用這樣做法來做魚，真的好好味架！！

 ----------------------------------------------------------------------------------

(土文:Mangal = 音: 萬交) 解: 燒烤