土耳其的士多啤梨

土耳其有D生果好出名, 例如蘋果, 在MEMET出生的地方AMASYA便是土耳其出產蘋果最出名, 如果買蘋果指明要AMASYA出產, 價錢可能會貴成倍, MEMET話真係比其他城市出產的蘋果相比之下, 係勁好味, 又勁多汁, MEMET話可能由細到大, 佢都食慣了AMASYA的蘋果, 絕不能會再食其他果D. 如果你問我係咪真係有唔同, SORRY, 我答唔到你, 皆因我好少食蘋果, 就算係香港都好少食, 要食, 就只食爽果D, 粉嘅蘋果咪攪我, 最好仲係青蘋果, 貪佢酸酸地, 最鍾意呢種感覺!!

如果你問我土耳其有咩生果推介, 在春天呢個時間, 我會推介士多啤梨, 夏天便會是車厘子, 土耳其有樣好, D士多啤梨勁便宜, 只是這樣咋, 其他野勁貴囉!! 可能佢地本身有種植的關係, 又大粒又甜, 大粒的價錢只是3-4LIRA一公斤, 即係為港幣15-20蚊兩磅幾, 細粒的價錢是2LIRA一公斤, 即10蚊就有兩磅幾, 我同MEMET現在平均一星期有三日都買士多啤梨做飯後果, 超正!! 我諗番在香港時, D士多啤梨最平都要廿幾三十蚊一磅囉, 完全唔捨得買, 超貴!!

呢度只是3.5LIRA一公斤, 嘩!! 超多囉!!

映埋D, 幾大粒!!

再映埋D, 係咪好想食呢!! NO WAY, 想食自己買啦!!

你地睇吓呢粒, 似唔似一個肥婆對腳同PAD PAD 呀?!

MEMET最鍾意點呢D糖粉食, 我就唔慣囉, 可能香港人關係, 我唔會點黎食, 不過, 我曾經去過台灣, D台灣人又係好鍾意點呢D糖粉食, 係, 點完黎食, 係甜D, 不過, 我覺得D糖粉蓋哂D士多啤梨嘅本身味道, 完全冇哂本身鮮甜味道, 你地又會唔會點黎食咖?

嘩, MEMET將D士多啤梨切哂D頭, 慢慢拮黎食, 我地仲買左澳洲啤梨呀, 又係超甜超好味囉!!

===============================================
çilek (strawsberry) (音: chi-lek)
Armut (Pear) (音:Ar-mut)
Meyve (Fruit) (音: Mey-ve)
===============================================

土耳其的星期日市場(Pazar)

呢兩星期開始了工作, 有新的生活, 但沒有時間寫BLOG, 比D BLOG友話我懶TIM. 其實我都好想寫呀, 不過, 真係抽唔到時間, 皆因一早起身便返工, 至到晚上八時才回到家, 再休息十五分鐘, 便要同MEMET一齊預備晚飯, 大家食完都成晚上十點啦, 連電腦有時都冇開, 就要預備沖涼訓覺啦, 邊到有時間寫BLOG呀, 所以千祈唔好話我懶呀!!

難得星期日放假, 又要同MEMET出去買餸, 呢度其實唔同香港日日有街市, 好多時都係買哂一星期嘅餸, 如果平時沒有餸, 只可以去超市買, D超市真係貴過人, 仲要等佢有特價時先買, 真係等到頸都長埋, 所以, 要買D平野, 便要去PAZAR啦..... 其實價錢普通平啦, 都唔係太平, 不過比超市平少少咁啦, 呢種街市叫做星期日市場PAZAR, 只開星期日, 一星期只開一次, 所以, 我倆便會去PAZAR逛吓, 睇吓有咩筍野執啦!!

呢個便是PAZAR啦, 每個地區都有一兩個PAZAR開, 其實D PAZAR是在一條長長嘅街上擺檔, 如果要由頭行到尾, 嘜都唔睇, 都可以行你十分鐘長, 可想而知, 都幾多人擺檔, 咩野都有, 好似成條花園街加女人街咁, 有日用品, 生果, 蔬菜, 肉類, 衣服鞋襪樣樣有, 任君選購

佢地有D人專係在早上便有人去弄D帳篷, 之後, D檔口便會續一開檔, 非常熱鬧!!

你地睇下D人都買到一抽二抽!!

有D連麵包都有得買, 呢種麵包超出名, 叫做Simit,  但在Izmir城市, 會叫佢做Gevrek. 問MEMET點解, 佢都話唔知點解喎...... 有時我覺得我老公究竟係唔係土耳其人, 咩都唔知土耳其D野!!! 呢個包, 表面係有芝麻的, 硬硬的, 不過, 裡面就好軟, MEMET話個包硬先叫做新鮮, 唔硬D人唔會買, 同埋D 人鍾意買番屋企後, 切開加芝士黎食, 都唔錯咖!!

你地睇吓D蕃茄幾紅, 我發現香港果D蕃茄係唔夠紅, 同好酸, 但呢度D蕃茄比較甜!!

講時講, 我覺得香港街市多野賣過呢度, 土耳其黎黎去去都係蕃茄蛋, 青椒, 青瓜, 菠菜.... 真係唔係多樣化

講番今朝早餐, 我要讚吓我ＨＯＮＥＹ，皆因MEMET又整左個心型蛋比我送麵包, 嘻嘻, 真係唔係好舒得食左佢, 好鬼靚！！佢都整得唔錯咖!!

===============================================
Pazar (market) (音 : Pa-zar)
Simit (sesame bread) (音 : Sim-mit)
===============================================

土耳其伊斯坦堡(四)

今次MEMET提議去Beşiktaş附近睇吓, 佢話Beşiktaş有個地方叫Ortaköy有好多野睇同有好多野賣, Ortaköy- Orta解作"中間", 而köy解作"鄉村", 即成個叫"中村" 咁解啦, 呢到其實就係上次我曾經介紹過果條好似香港的青馬大橋的歐洲區那邊, 咁我地星期六就出左去睇, 我地由屋企乘Metrobus去到Şişli再轉乘巴士去Ortaköy. 途中見到一個Müze(博物館)的建築物好靚, 雕琢好細緻

連個門口都精緻過人

還途經四季酒店(Four Season)

到啦, 原來Ortaköy好似女人街, 咩野都有得賣, 仲好多人呀!!

呢間舖頭D野仲好似香港D舖頭咁, 賣D好多唔同款式嘅燈, 有五顏六色, 好鬼靚, 但影左出黎就冇咁靚!! 

呢到仲有D屋好靚同埋有好多旅遊人土和土耳其人都黎呢到TIM

我仲發現有隻包超好味, 叫做Midye Tava, 仲好食過煎魚包十倍, 價錢又一樣, 我超鍾意食, 原來在TAKSIM都有得賣, 不過, 唔係好起眼, 所以從來都唔知有, 總之, 你地有機會黎土耳其一定要試呢個包, Midye Tava即係等如Fried mussels, 原來係用青口D肉炸完之後, 再加特製白色醬汁而成, 我食極都食唔出佢係用D咩黎做, 等我下次再試清D就話你地知呀!! 總之, 五粒星爆燈!!!

佢地就係咁樣炸完之後加D鹽加D白色醬汁去個包到, 只賣4lira(即23元港幣一個), 同煎魚包價錢一樣

我地行到呢到, 左邊全部都是小賣部, 有好多唔同野食賣, 例如, 焗薯, 煎魚包, 羊肉燒烤, 炸青口包........ 樣樣都有. 依, 呢位哥哥做咩咁樣呀, 莫非女朋友唔比你食咁多, 驚肥?

再行過D, 見到燒羊腸包kokoreç(grilled sheep's intestine), 我比MEMET激死, 因為佢騙我這是牛腸包, 話叫我試吓, 咁我就走去買黎試吓啦, 嘩, 佢明知我唔食羊, 我一試便試到龍與鳳啦, 即刻掉番比佢食, 豈有此理話

我地仲影左少少影片, 佢地又係加D鹽, 加D辣粉, 在片中, 果個人仲問我辣唔辣, 點知我同MEMET一齊答佢唔同野, 我話少少, MEMET話好D辣, 攪到個人仲望吓我TIM, 我仲有問佢幾錢咖, 佢話3.50lira, 點知我只聽到3lira你話啦, 我D聽解能力幾差吖!! 唉!!



呢個就係包裝紙包住, 嘩, 原來呢間店舖都有成37年歷史喎!! 包裝紙上面仲寫住Afiyet Olsun, 即係enjoy your food咁解!!

其實如果食到羊嘅朋友, 都應該鍾意食, 皆因, 佢係燒到脆脆的, D肉又多汁, 我試完其實都覺得唔錯, 但係果種味, 到最後都頂唔順, 不防你到都去試吓!!

=======================================================
Orta (Middle /Medium) 中間(音:Or-ta)
köy (village) 鄉村 (音: 渠)
Midye Tava (Fried mussels) 炸青口包 (音:mi-d-ye Ta-va)
kokoreç(grilled sheep's intestine)燒羊腸包(音: ko-ko-rech)
Afiyet Olsun!! (enjoy your food) (音:Ar-fi-yet Ol-sun)
========================================================