土耳其的飯

回想起之前, 我記得第一日到土耳其家, 頭一個星期每餐晚飯並唔係由我煮, 因為我唔識煮飯, 由其土耳其菜, 仲記得有次比亞媽喺MSN到笑我同Memet, 點解佢笑我們? 原因係... 果次我嘗試去煮飯, 那當然是煲香港飯啦!! 但係....... 我煲燶左, 我就問我媽點煲啦!!!

"媽咪, 我今日煮飯, 點知煲燶左!!!! 其實係點煲先至靚同唔會燶架?" 我笑住咁同媽咪講

"吓? 嘜Memet娶個老婆番去, 原來係唔識煮飯咖?!! ............." 媽咪笑到見牙唔見眼咁係MSN到大大聲咁講..那當然, 喺香港全家人都聽到哂啦!!!   

"哎呀!!! #$&%*&*....." 我好無耐咁望住佢喺到大笑.....

根據我本人分析, 其實根本唔關我事, 只是土耳其係冇電飯煲呢家野!!佢地唔會用電飯煲, 因為煮法唔同, 咁你地話啦，我應該係點煮先至唔會煲燶飯先，唔通真係好似以前Ｄ人咁，要睇火？？唔係啩？？

那晚上，我是完全地失眠，皆因比媽咪咁樣笑法，我老公唔出聲，我自己都覺得唔好意思啦！！就咁樣，思前想後，要立心去學煮飯。我由一個唔識煮飯嘅人, 變左現在日日喺屋企煮飯,  仲覺得自己對煮野食呢方面好有潛質，sorry!! 因為評判只有一個人，佢仲比我好高分tim，咁你地話係唔係我好有潛質呢！！

首先, 唔好誤會, 呢包唔係土耳其米, 土耳其米唔係咁, 係同一般香港米一樣

呢個係好似D粉仔咁, 我只知道用黎配入去D米到!! 質地好似D通心粉!!

先落牛油在鍋中, 之後放上面D粉仔落去, 少量便可, 只是用作裝飾D飯

炒至金黃色, 便可!!

之後再加入米於鍋中一同炒, 大火!! 加入少許鹽 (嗱, 睇唔睇到D土耳其米呀! 你地話係唔係同香港米一樣先)

約三四分鐘, 之後便加水或溫水, 將之煲滾, 然後將火轉為細火, 繼續煲, 約佢約十五分鐘左右便成. 那當然要加蓋煲啦!!

 

你地睇吓!! 成品!! 好好味咖!! 因為落左D鹽同牛油, 好香口同好"棉", 因為土耳其米有D似日本米, 煙煙'UN UN"的, 我諗可以用黎做壽司都得!! 下次等我試下用香港米煮, 睇吓個結果一唔一樣先!!!不過, 要等我番香港先有得試!!

Pilav / Pirinç (rice) (音: Pil-av , Pir-in-ch)

Tereyağı (Butter)  (音: Te-re-ya-ğı)

Tuz (Salt) (音: Tu-zz)

我在土耳其的亞洲朋友

我已經黎左土耳其大大話話都有四個半月了, 但是我D土耳其文仲未識得聽, 只可以聽到D簡單字句, D生字仲未記得好好, 不過, 都可以講到一兩咀咖!! 由其看電視節目時, 他們說話的速度快得驚人, 只有賣廣告時, 聽的比較易一點, 由其成日聽到一個字, 由朝到晚D廣告都講, "Sadece..." 即係話..."只是....."多少多少錢, 因為咁樣講, D觀眾見到咁便宜的商品, 便會仆倒去買囉!!

所以好多時都會在家中上線識朋友, 直到現在為止, 我都識左唔少亞洲女孩, 計計吓都有廿個女孩子跟土耳其有奇妙的關係, 而其中有些住在土耳其的, 而又曾經見過面的,暫時有五個, 兩個是來自香港, 一個新加坡, 一個台灣, 一個日本,  再過多一個月, 又會多一個香港女孩來土耳其, 不過, 她本身是住在澳洲的, 你們知道嗎? 可能大家都是來自亞洲, 所以感覺比同相識當地的女孩多了一份親切感.

之前, Ginnie過來的時候, 我也介紹了其中一位香港女孩Phoebe給她認識, 而Phoebe本身是住在Ankara, 我們並不是可以常常見面, 但她每次到Istanbul, 我們都會約出去, 見見面, 食食飯, 行行街, 吹吓水.不過, 過了情人節, 她便要回香港, 可能要過一段時間大家才可以見面啦!!!

而另外我在網路上, 認識了來自台灣的Gina, 她的家住在我家附近, 只須乘十五分鐘車便可以去到, 她家隔離還有一間超級大型的超市, 如去她家, 可以順道買些菜及逛逛超市, 我之前曾到她家裡學土耳其菜, 學一道菜, 我倆便可以消耗半天時間, 一來學學國語, 因自己的國語底子不好, 二來又可以學學土耳其菜, 三來, 又可以逛超市購物, 一舉幾得麻!!

而另外一位是Evon, 我認識她其實都幾轉折, 因為我在香港的時候又是在網路上認識了幾個台灣女孩, 她們知道有位台灣女孩Amy已住在土耳其的Istanbul, 所以她們介紹了Amy給我認識, 但是當我未到土耳其時, Amy便要去回澳洲定居, 所以她就介紹了Evon給我認識, 而更好的是, Evon是講廣東語的, 原來她父母本身是廣東人, 所以由小到大在家裡都是講廣東話, 唔怪得之佢D廣東話講得咁好啦!!! 

這天, 我們三人約了一起出去食中國菜, 那天更是大年初一, 這間的中國菜味道相當不錯, 價錢亦非常公道, 在Taksim頭直行到中間, 靠左手邊舖轉左便是, 名叫"中國餐館", 埋單每人都是約12lira =相等約65元港幣, 我們當天點了一碟星加坡炒米粉, 一碟炒飯, 和一碟咕嚕雞球, 非常好味!! 我都好想回家學弄這個咕嚕雞球菜式, 不過, 好似好難買到甜酸醬呢!! 其實, 都唔知呢間中國餐廳本身有冇落味精呢?? 實在太好味了.最好笑係, Evon話從來都唔知有"星加坡炒米粉"的這樣菜式在星加坡, 唉!! 咪又係商人的一個卓頭, 如果唔係, 我地都未必會點呢個菜式啦, 哈哈!!

你們看看這裡是不是好有新年氣氛呀??

======================================================

Sadece (just / only) (音: Sa - de -je)

Reklam (Advertisment) (音: Reck-lam)

Asya (Asia) (音: Ar-sh-ya)

Japon (Japan) (音: Jap-pon)

Singapur (Singapore) (音: Singa-pur-s)

Tayvan (Taiwan) (音: Tai-wan)

Hong Kong 讀音同寫法都一樣

======================================================

 

我Honey - Memet之生日

呢日二月三日, 晴天, 係我Honey - Memet之生日, 我下午便去超市買雞腿, 蠟燭.... 等等嘅野, 係預備這晚的燭光晚餐, 只是出去購物, 已經用左我成兩粒幾鐘, 回家後快快set枱, 預備焗雞腿, 其實想買成隻雞番黎焗, 皆因前幾日已經食過, 咁就焗雞腿啦, 又快又方便.

當set枱時想起土耳其有個節目係講有關煮野食大賽, (其實呢個節目係抄美國某個電視台的), 個節目係講每次有五人在五天內去各人家裡食晚餐, 每晚去食野嘅客人會比分數給煮野食的那個人, 分數包括當晚在那個人家裡的排場, 食物質素及令客人之滿意度, 我很喜歡這個節目, 因為可以睇到唔同人嘅藝術, 例如: 買菜嘅情況啦, 點煮野食啦, 方式啦, SET枱嘅設計啦, 點樣款待客人的方式啦, 食後佢地嘅口臉嘅突變啦, 同埋有時佢地仲會喺主人家屋企爭吵不休, 總之, 各式各樣, 又夠爭議性, 又夠娛樂性, 雖然我冇佢地嘅排場, 只要用心去做, Honey一定開心咖!!!

我仲set埋D懶係romantic嘅音樂, 一邊不停播, 不知幾enjoy!!我還打扮像出街食飯一樣, 哈哈, 如果你地問我係土耳其悶唔悶??!! 我話你知, 我不知幾enjoy.......OK! 等Honey call我之時, 便是開始焗雞嘅時間, 因為佢番到黎都要45分鐘, 時間剛剛好!! 當晚, 有湯, 有主菜同甜品, 其實應該買酒, 但係我唔係好識飲酒, 咁就買支車厘子汁代替紅酒啦, 哈哈!!

當Memet回來的一刻, 我又將全屋的燈熄哂, 加上我換了一身打扮, 又有醉人嘅音樂, 他即時已陶醉不得了, 我說:

"Happy Birthday!! Pleace come to our resturant......" 拖著他那暖暖的手走進我們的飯廳

"oh!!!! so beautiful!!!....... Thank you!!!!" 他滿心歡喜地說著

在這時, 一首動人音樂播著, 係'loving you'.... 唱著".....Cause lovin' you has made my life so beautiful....".......... 我倆便隨歌起舞著............

之後, "叮"的一聲吵醒了我倆, 原來是焗爐D雞焗好了.....%$*&^%!?!$#.....咁我便去取湯, 他還拍下當時的情景!!

你地睇吓, 係咪好似好好味呢?? 其實真係好好味架, 今次係我第二次焗雞食, 真係好易做, 只是落了鹽, 胡椒, 幾樣不同調味粉在表面, 再加蕃茄(可以提供水份), 薯仔(要反轉來焗), 甘筍, 青椒, 蒜頭及洋蔥, 焗45分鐘攪掂, 你地都試吓焗吓啦!! 不過, 記住要落多d鹽喎!!!!!!!

 

同佢影番張 '蠋光下的他' 先

哈哈, 食完隻雞腿好飽呀!!

Memet都話好飽, 另外, 佢仲扮演Waiter, 一人演兩個角色, 仲好攪笑, 我都有份玩個呢個 "Waiter". 當晚嘅晚餐, 用左成兩粒鐘去享受, 真係好鬼死似出去餐廳食飯咁, 就黎情人節啦!! 大家不防在家同身邊個Honey享受吓啦!! 又唔駛出去食D又貴又唔好食嘅情人節餐吖嗎!!

我手中舉起的是我第一次做嘅Tiramisu, 個賣相麻麻地, 不過, 味道剛剛好, 我因為都幾鍾意Baileys嘅味道, 所以我是落Baileys酒, 唔會太濃又唔會太淡, 好味!! 另外, 呢對杯, 係我一個好朋友送比我地嘅結婚禮物, 所以刻著我倆的名. 仲有套餐具同鹽樽是我細妹送嘅, 仲印有一對結婚公仔咖, 現在剛剛可以一齊用到!!

=======================================================

fırında pişmiş (baked) (音: fer-ern-da pee-sh-mee-sh)

Tavuk (chichen) (音: ta-vook)

Mum (candle) (音: moom)

Garson (Waiter) (音: Gar-song)

Şarap (Wine) (音: sha-rap)

=======================================================

 

我Honey - Memet之生日前夕

前一陣子好忙, 皆因Memet媽咪同Ginnie到我們家足三星期, 所以完全沒有空檔寫BLOG及溫習土文, 那當然退步了, , 而在二月三日是我Honey的生日, 都唔知送咩野生日禮物, 又特別, 又實用, 因媽咪來的時候, 她織緊一件毛衣給她女兒, 而給了我的啟示, 便是織頸巾了, 雖然只得一個月都唔夠, 勤力D, 應該可以織起的, 便每早等Memet返工後, 便開始我的工作, 織頸巾了, 而一些朋友叫我出去, 我都說我正在忙碌著, 終於在一月尾已織好超過六呎長的頸巾了, 還去買了一張花紙及絲帶包得靚靚的...

而在佢生日前一天, 即二月一日晚, 當他回家的時候, 好多時我都會站在門口, 說著歡迎說話, 但那天因忙著跟香港一位朋友DORIS開CAM在MSN聯天, 完全忘記了我的職務, 就係煮飯啦!! 開門給他進來後, 一眼都沒有望他, 便連忙轉頭便沖入厨房去作飯, 便即刻跟他說: "我剛跟DORIS聯天, 她還在MSN中, CAM尚未關閉, 你去跟她打聲招乎吧!!" 用怱忙的聲調去掩飾自己遲了煮飯的罪行, 我還低下頭的切著菜.....

但他不發一聲的站在我後面,  突然說了一句: "Hoşbulduk!!" (意思是: 好高興我到來!!)

我還傻傻的回答他: "Hoşgeldin!!" (意思是: 歡迎你來到!!) 吓!! 心想有些怪怪的, 次序應該是我講先, 他才回答, 為何他說著這句話, 算吧!! 因忙著煮菜, 不用多想, 我便說:

"為何不去跟我朋友打招乎呀?? 入去啦, 我好忙咖!!" 心想我自己遲了, 還話了他, 今次完全自己是在上風, 哈!! 他還是站著不發一言, 豈有此理, 便想回頭問個明白....一回頭

"OH!! 做咩呀??" 開頭心裡有點罪惡感, 之後, 由罪惡感變成有點憤怒, 再由憤怒變成驚喜, 再由驚喜變為感動, 前後只是一分鐘, 心情有那麼大的起伏....

"為何送扎花給我呀? 好靚呀!! 多謝呀!!" 雖然扎花整體上係唔夠氣派, 但皆因小小的一扎花, 已經完全是滿分了. 自己心裡想著: '莫非他想提我要送禮物給他, 因他明天生日!!!'

二月二日晚接近零晨12點, 他朋友當晚來了家探望他, 才到十一時五十分才走, 我便叫他快快去洗澡, 因為好讓我在這十分鐘去預備送上蛋糕及生日禮物, 到十二時了, 我便去關了全屋的燈, 好讓他出來問發生什麼事..... 哈哈!!! 和我預期一樣, 他便開門走出來問發生什麼事,,, 在這刻, 我由厨房慢慢的步行出來, 唱著:

" Happy Birthday to you. Happy Birthday to you, Happy Birthday to my husband - Memet......"我一手拿著我做的Tiramisu, 另一手拿著禮物, 在細細微弱的燭光下看見他的微笑, 由慌忙變成喜悅, 我心裡完全充滿喜悅.

佢許了願之後, 還折開了我送給他的手織頸巾, 開心到不得了, 這是我給他的第一次生日禮物, 因為每次過去見面都不是在我倆的生日日子, 不過, 他說呢份禮物好有價值, 因為係我用手織嘅!!佢要好好珍惜!! 哈哈, 當然啦! 我辛苦左成個月咖......

(這張相是由VIDEO裡剪出來的, 所以質素有點不同)

================================================

kaşkol (neckerchief) 頸巾 (音: ca-sh-col)

Hoşgeldin (Welcom) 歡迎  (音: ho-sh-g-el-din)

Hoşbulduk (I am glad to be here) 好高興我到來 (音: ho-sh-bul-duk)

Çiçek (flower) 花 (音: chi-ch-ek)

Doğum gününüz kutlu olsun!! (Happy Birthday!!) (音: go-oom gewn-ew-newz koot-loo ol-sun)

Hediye (Gift) (音: he-di-ye)

================================================

 

土耳其春捲Sigara Böreği及土耳其青口包飯Midye pilavı

有個BLOG友- 噢! 地利 ..Oh!tria 對土耳其食品好有興趣, 前一排佢喺奧地利維也納的某間專售土耳其食品的商店買左包類似Sigara Böreği 煙仔酥皮春捲點心, 個樣好似香港嘅春捲點心, 但係煮完之後有D唔同土耳其食品, 皆因佢話炸完之後, 個皮唔脆, 入面又冇"函", 所以今次我寫特意介紹一下.

呢隻Sigara Böreği 煙仔酥皮春捲點心本身可以在普通的超市買到, 價錢是2.75lira一盒, 大約港幣15元左右, 每盒裡面有20條煙仔春捲, 雪在冰箱裡頭, 如果食時, 不須溶雪, 便可放進PAN入面炸, 約三份鐘左右, 炸至金黃色, 盛起隔油上碟即成, 食法是與YOGURT一齊同食, 好多時我會點到成支煙仔春捲都係YOGURT先食, 非常好味, 我個人認為因為YOGURT本身淡淡地凍凍地, 與之同食可帶出芝士香味, 又可以減低炸後產生之熱氣, 每次最少食兩條, 有時一次過會食成四五條, 我老公仲勁, 佢每餐可以食成八九條, 但我驚太熱氣了, 我只批准佢每次最多食四條.    

炸完之後便是這樣子, 好脆好鬆化, 裡頭D芝士咸咸的, 點YOGURT食, 超正, 之前上次Ginnie有問過點解唔點千島醬或其他沙律醬, 一定要同YOGURT一齊食, 因為YOGURT冇味, 咁我就比碟千島醬比佢點黎食, 食後佢都覺得點YOGURT好味D, 皆因, YOGURT同芝士同種, 同埋YOGURT完全帶出芝士嘅香味, 而千島醬將芝士味道覆蓋哂, 食後完全唔覺有芝士味道, 只有千島醬及酥皮味, 不過, 唔同人有唔同口味, 可能有D人真係當佢係香港點心, 用黎點唿汁食呢!!

其實如果可以, 自己去街市買D酥皮番黎, 再買隻碎粒型嘅芝士粒, 不過呢隻芝士放落油係唔會溶嘅, 不過我唔記得個名係咩!! 有待下次告之, 咁之後就好似包春捲咁包, 落鑊, 盛起, 隔油, 食得, 點醬, 超易!!

你地見唔見到真係有碟仔係千島醬呀? 我就係比左D呀Ginnie試食呀, 不過我就用黎點右上角嗰碟腸仔嘅..... 而隔離嗰碟係Midye Pilavi 青口包飯, 可能你地會覺得, 吓!! 點包呀??青口喎!! 話你聽, 呢個小食超好味.

呢個小食其實多數你會見到D小賣檔有得賣, 有時有D賣海鮮餐館都有得賣, 價錢約0.5lira一隻, 大約港幣3元到, 多數一次過最少我都會買十隻以上, 買時佢地會比埋舊檸檬, 不過, 好多時, 一舊檸檬係唔夠我老公食, 我會預定D檸檬係屋企, 佢食親都會用兩個檸檬或以上, 超級檸檬怪, 好彩佢唔係請我食啫, 而我多數都去D餐館買, 你地知啦, 香港教育我地海產食品要去有註冊嘅商店先好買, 不過, 我見好多土耳其人都係就咁喺D小賣檔前一隻一隻咁食, 個檔主仲幫D人一隻一隻咁滴D檸汁, 食完一隻再比一隻, 賣相都幾得意!!

呢次我就買左十四隻, 都成7lira, 不過, 如果你地黎土耳其必定要試下, 味道酸酸咸咸的, D飯又lim lim 地, 好好味!!

呀!! 唔記得講嘅係, 入面個青口只是得剩番一塊皮仔, 就好似下圖一樣, 並沒有其他啦, 其他D肉就唔要咖啦, 佢地話果D係唔食得喎, 因為佢地話其他D肉污穢不堪, 所以掉哂, 唔係麻, 得番塊皮, , 唔似我地香港咁, 除了個殼之外, 全部D肉幾乎都食哂, 不過, 我諗深入D, 其實可能有D商人收集哂其他D肉去再造其他用途, 有咩可能掉哂先 

另外, 佢地食時是有個方法, 先擳一些檸汁落D飯到, 好似食生蠔咁, 之後就將另外冇野嘅殼掘起有飯的那個殼底, 即由D飯嘅底部掘起, 咁樣, 成舊飯就會好容易咁掘起左出黎, 之後就放入口食啦!!! 真係好好味咖!!!

=======================================================

Sigara Böreği (deep fried rolls with cheese filling)   煙仔酥皮春捲點心

Sigara (cigarette) 香煙 (音: Ci-ga-ra)

Böreği (pastry) 酥皮 (音: Bur-re-ee)

=======================================================

Midye Pilavi (mussel stuffed with rice / pilaf)青口包飯

Midye (mussel) 青口 (音: Mi-d-ye)

Pilav (rice / pilaf) 飯(調味料煮成) (音: pill-af) 同英文pilaf讀音一樣

=======================================================