2009年的頭二十天(三) - 另類的蘋果茶

一月八日，晴天，Ginnie終於平安由Selçuk回來，佢乘坐飛機由Izmir 到Istanbul只需45分鐘，價錢約45-55Lira相等於2xx港幣，同乘長途巴士價錢差不多，那當然坐飛機啦，因為坐長途巴士的話，要坐成八至十個鐘，坐到傻！

這天中午出到機場接佢，佢在機上認識了一位土耳其女孩，這女孩來Istanbul見工，原本佢喺Turkish airline應徵空姐，希望佢能夠成功啦！！

跟住，我倆去左Sultanahmet行，因為天氣好好，出去吸吓Ｄ空氣，個人都精神Ｄ，之後我地去左一間餐廳食午飯，還叫了蘋果茶，這次的非常好飲，好有青蘋果味道，而呢個飲品應該係沖粉出來的，同之前喺Taksim飲果杯完全唔同，好清新的味道，不過，茶味少左ｄ，如果同上次比較我會喜歡今次呢隻蘋果茶，因為我鍾意食青蘋果！！

而ginnie都話呢隻蘋果茶好味Ｄ，佢同我係周圍搵，坊間的確有好多唔同品種嘅蘋果茶，有Ｄ要煲，有Ｄ好似茶包咁，而佢都好想買Ｄ返去香港做手信，終於比我地去到Taksim有間專賣甜食同零食嘅店舖買到，佢個傻婆一買就買左十八包，其中有十五包係細，價錢是2.75Lira一包，約13-14蚊港幣，大嘅係5.5Lira一包，約30蚊港幣，連我自己都買左一大包番屋企飲。

Elma Çay = Apple Tea