土耳其的渡海小輪

我地兩個一到熱天就精神, 好似D蛇虫鼠蟻冬完眠一樣, 要出動咁, 而家每星期尾, 一到WEEKEND, 我便同MEMET出去周圍逛街, 上兩個禮拜先同佢出左去, 不過又係TAKSIM同Kadıköy遊吓, 之前搭過觀光船, 今次我地搭小輪, 就好似香港過九龍一樣, 但我地係由歐洲去亞洲, 哈哈, 好似講到好遠咁, 其實都係好似普通過海咁樣!!

出到TAKSIM, 我地行左一陣, 就乘小巴(Dolmuş)去轉小輪(vapur), 在小巴途中, 見到有人修路, 就諗起香港, 因為香港都係周圍有修路工程, 唔知點解可以周圍都有, 係咪咁樣可以增加生產力呢? 真係要問吓政府, 之前我去過日本, 個導遊話我地係睇唔到D日本人在日間修路, 因為會影響市容, 係咪呢? 有冇人知呀?

由TAKSIM乘小巴只需五分鐘左右, 便到了這個碼頭, MEMET話這個碼頭係去亞洲Kadıköy嗰邊, 但想入去時, 個SECURITY話原來搬左去第二度, 好彩, 只是行三分鐘便到, 但是, 因為趕船, 所以唔夠時間影個碼頭個樣TIM.....

上到船, 我地上左去上層露天位嗰度映相, 由這裡影出去, 下層的兩側是有位坐的, 而兩層都係同一個價錢, 唔記得幾錢TIM, 好似係1.5 LIRA (即差不多十元港幣), 貴過香港渡小輪, 不過, 佢大隻過香港小輪好多, 好似坐緊去長洲D船咁!!

小姐, 唔好睇唔開喎, 睇吓風景好啦!!

嗱, 遠處我地見到好似青馬嗰條橋呢, 而前面個隻就係上次我坐嘅其中一種觀光船啦!! 喂, 唔好話我有歧視, 前面呢兩條友仔, 當我影完相之後, 佢地喺度咀咀喎, , 我同MEMET都唔敢咁張揚啦, 佢地.... 唉!! 其實土耳其D同性戀者都幾多吓!!

影吓MEMET先, 嘩, MAN好多

呢隻便是其中一隻觀光船啦, 價錢都好似要成20LIRA一次, 成百元港幣咖, 嘩, 佢都幾好賺喎!!

呢度便是入面D坐位啦, 完全係我有我影相, 你有你忙碌!!

坐坐吓有D肚餓, 便同MEMET走去小食部食吓野, 好多野賣, 由D廣告睇得出, ÜLKER係土耳其一間幾出名嘅公司, 就好似雀巢咁, 佢地D野都唔錯, 好多時我都有買佢地出D消化餅食, 唔錯咖!!

呢度賣嘅茶(Çay)只是0.5 LIRA咋, 好平呀! 平時係出面要成1.0LIRA咖!! 我見到有個Tost Karkşık都係賣1.75LIRA, 入面有土耳其香腸(Sucuk)加CHEESE, 咁就叫左杯茶同TOAST試吓啦!

佢地仲有另外一隻叫TOST KAŞARLI, 只是CHEESE加麵包, 都要成1.5LIRA!!

其實呢個小輪入面係有座位供應比D食客, 但係滿哂座, 咁唯有坐番入面D座位度食啦!

呢個多士, 入面有土耳其好出名嘅香腸加芝士再烘製而成, 真係好好味, 等我下次做佢黎當早餐先!!

D香腸咸咸地, 仲加埋D芝士, 完全係比個"正"黎形容佢!!

到啦, 終於到左亞洲區Kadıköy啦!! 你地會見到呢個波波形嘅物體, 好似係氫氣球黎咖, 可以比D遊客坐住佢遊ISTANBUL, 不過, 我唔禁坐, 唔知係咪年紀大, 有D開始偎高呢!

臨落船見到海裡面有好多水母, 原來水母叫Deniz anası, 其實有時我覺得土耳其文同廣東話差不多, 因為Deniz解海, 而ana解母親, 即同廣東話一樣, 係海裡面嘅母親, 咁有冇人知道點解呢D叫"水母"呀?

臨走即刻影多張相, 因為無咩人, D人去哂預備落船!!

今次去到TAKSIM, 見到有座好古舊嘅建築物, 建於十七世紀, 叫做Galata Tower (Galata Kulesi), MEMET話呢座建築物係好出名, 因為好多年前, 應該是尚未有飛機年代, 試過有好幾個土耳其人曾由此處頂樓, 行用類似滑翔機物體, 由此處飛越(好似青馬果條橋呢!)及去亞洲區, 所以有好多旅遊人士都黎呢度感受吓呢個人飛出去果陣時嘅感覺, 因為呢座建築物喺當時黎講, 係伊斯坦堡最高咖喇!! 其實講真, 佢又唔係太高, 都唔知果D人點用D風飛去亞洲區果邊, 頭先坐小輪都坐成20分鐘啦!! 不過, 土耳其的確有時幾大風吓!!

現在呢度如果要上去, 要比入場費5LIRA, 剩係上一上去望吓風景都要成30元港幣, 又唔係香港山頂咁靚, 所以我從來都冇上過去睇吓, 而家上面有酒吧同餐廳TIM

================================================
Dolmuş (Shared bus 小巴) (音: Dol-mush)
Vapur (streamship) (音: Wap-poor)
Hafta sonu (Weekend) (音:Haf-ta song-nu)
Deniz anası (Jellyfish 水母) (音: Den-niz a-na-see)
Galata Kulesi (Galata Tower) (音: Ga-la-ta Ku-le-si)
Sucuk (Turkish Sausage) (音: su-cuk)
Tost kaşarlı (Toasted bread with cheese) (音: Toast Ka-shar-leer)
Tost Karışık (Toasted bread with Turkish sausage) (音: Toast Ka-ree-sheek)
=================================================